കോഴിക്കോട് കൊയിലാണ്ടിയിൽ മിന്നലേറ്റ് നാല് മത്സ്യത്തൊഴിലാളികൾക്ക് പരുക്ക്. ഹാര്‍ബറില്‍ നങ്കൂരമിട്ട മത്സ്യബന്ധന ബോട്ടിൽ ഉണ്ടയിരുന്നവർക്കാണ് പരുക്കേറ്റത്. ഗുരു കൃപാ ബോട്ടിലെ ടി.ടി. നിജു, ടി.ടി.ശൈലേഷ്, ടി.ടി.സന്തോഷ്, ടി.ടി.പ്രസാദ് തുടങ്ങിയവര്‍ക്കാണ് പരുക്കേറ്റത്. നിജുവിൻ്റെ കാലിന്റെ എല്ല് പൊട്ടലുണ്ട്. ഇവർ നാല് പേരും കോഴിക്കോട് മെഡിക്കൽ കോളേജിൽ ചികിത്സയിലാണ്.
ഇന്നലെ രാത്രിയാണ് സംഭവം. ബോട്ടില്‍ നിന്ന് മത്സ്യം നീക്കുന്നതിനിടയിലാണ് മിന്നൽ ഏറ്റത്. തണ്ണീംമുഖത്ത് വലിയപുരയില്‍ ടി വി രഞ്ജിത്തിന്റെതാണ് ബോട്ട്. ഇടിമിന്നലിൽ ജി ടി എസ്, വയര്‍ലെസ്, എക്കൊ സൗണ്ടര്‍ ക്യാമറ, ബാറ്ററി, ഡയനാമോ തുടങ്ങിയവയും കത്തിനശിച്ചു. അഞ്ചുലക്ഷത്തോളം രൂപയുടെ നഷ്ടം ഉണ്ടായതായാണ് വിലയിരുത്തൽ.
