തമിഴ്നാട്ടിലെ തിരുവണ്ണാമലയിൽ കാറും ബസും കൂട്ടിയിടിച്ച് ഏഴു മരണം.14 പേർക്കു പരുക്കേറ്റു. മരിച്ചവരിൽ ആറു പേർ അസം സ്വദേശികളാണ്. ഒരാൾ തമിഴ്നാട്ടുകാരനും. പോണ്ടിച്ചേരിയിൽ നിന്ന് ഹൊസൂരിലേക്ക് പോവുകയായിരുന്ന കാറും എതിരെവന്ന തമിഴ്നാട് സർക്കാർ ബസുമാണ് കൂട്ടിയിടിച്ചത്. മരിച്ചവർ കാറിലുണ്ടായിരുന്ന യാത്രക്കാരാണ്.
പുതുച്ചേരിയിൽനിന്ന് ഹൊസൂരിലെ പശ ഫാക്ടറിയിലേക്കു പോകുകയായിരുന്ന കാറാണ് അപകടത്തിൽപ്പെട്ടത്. ഫാക്ടറിയിലെ തൊഴിലാളികളാണ് മരിച്ചത്. തിണ്ടിവനം – കൃഷ്ണഗിരി ദേശീയപാത 77ൽ തിരുവണ്ണാമലൈ ജില്ലയിലെ ചെങ്ങം ടൗണിന് സമീപം രാത്രി 9.20 ഓടെയായിരുന്നു അപകടം. കാറിനകത്ത് ഒൻപത് പേരുണ്ടായിരുന്നു. ഡ്രെെവറൊഴികെ മറ്റുള്ളവരെല്ലാം അസം സ്വദേശികളാണ്. പരുക്കേറ്റവരിൽ പലരുടെയും നില ഗുരുതരമാണ്.
