ദുബൈയില്‍ കോപ്-28 ഉച്ചകോടി തുടങ്ങാന്‍ ആഴ്ച്ചകള്‍ മാത്രം ശേഷിക്കെ ഹോട്ടല്‍ നിരക്ക് കുത്തനെ ഉയരുന്നു. അതിവേഗത്തിലാണ് ഹോട്ടല്‍ മുറികള്‍ ബുക്ക് ചെയ്യപ്പെടുന്നത്. ചില ഹോട്ടലുകളില്‍ അഞ്ചിരട്ടി വരെയാണ് നിരക്ക് വര്‍ദ്ധന.
നവംബര്‍ മുപ്പത് മുതല്‍ പന്ത്രണ്ട് വരെ നീണ്ടുനില്‍ക്കുന്നതാണ് കോപ്-28 കാലാവസ്ഥാ ഉച്ചകോടി. ഉച്ചകോടിയുടെ ഭാഗമായി ലോകത്തിന്റെ വിവിധ ഭാഗങ്ങളില്‍ നിന്നായി എഴുപതിനായിരത്തോളം സന്ദര്‍ശകര്‍ ദുബൈയിലേക്ക് എത്തും എന്നാണ് പ്രതീക്ഷിക്കുന്നത്. ഇതോടൊപ്പം യുഎഇയില്‍ ശൈതക്യകാലവിനോദസഞ്ചാര സീസണ്‍ കൂടി ആരംഭിക്കുന്നതാണ് ഹോട്ടല്‍ മുറികള്‍ക്ക് ആവശ്യകത വര്‍ദ്ധിപ്പിച്ചിരിക്കുന്നത്. കോപ്-28 ഉച്ചകോടി നടക്കുന്ന ആദ്യ ദിവസങ്ങളില്‍ എമിറേറ്റിലെ മുപ്പത് ശതമാനം ഹോട്ടല്‍ മുറികളും ബുക്ക് ചെയ്യപ്പെട്ടുകഴിഞ്ഞു. ശേഷിക്കുന്ന മുറികള്‍ അതിവേഗത്തിലാണ് ബുക്ക് ചെയ്യപ്പെടുന്നത്.
ആവശ്യകത കൂടിയതോടെ ഹോട്ടല്‍ മുറികളുടെ നിരക്കുകളില്‍ വലിയ വര്‍ദ്ധനയാണ് രേഖപ്പെടുത്തുന്നത്. ഇതോടൊപ്പം യുഎഇയുടെ ദേശീയദിന അവധികള്‍ കൂടി എത്തുന്നത് ഹോട്ടല്‍ മുറികളുടെ ബുക്കിംഗ് വര്‍ദ്ധിപ്പിച്ചിട്ടുണ്ട്. ശൈത്യകാലം ആരംഭിക്കുന്നതോടെ ദുബൈ വേള്‍ഡ് ട്രെഡ് സെന്ററില്‍ അടക്കം നടക്കുന്ന പ്രദര്‍ശനങ്ങളിലും മറ്റ് പ്രധാന പരിപാടികളിലും പങ്കെടുക്കാന്‍ കൂടുതല്‍ ആളുകള്‍ എമിറേറ്റിലേക്ക് എത്തും. ഇത് ഹോട്ടല്‍ മുറികളുടെ ബുക്കിംഗ് കൂടുതല്‍ വര്‍ദ്ധിപ്പിക്കും.
