ദുബൈയുടെ ചില മേഖലകളില്‍ ടാക്‌സി നിരക്കുകള്‍ വര്‍ദ്ധിച്ചു. ഗ്ലോബല്‍ വില്ലേജ് അടക്കമുള്ള പ്രദേശങ്ങളില്‍ നിന്നുള്ള ടാക്‌സി നിരക്കുകളില്‍ ആണ് വര്‍ദ്ധന. പ്രാഥമിക നിരക്ക് പന്ത്രണ്ട് ദിര്‍ഹത്തില്‍ നിന്നും ഇരുപത് ദിര്‍ഹത്തിലേക്കാണ് വര്‍ദ്ധിച്ചത്.ദുബൈയിലെ മുഴുവന്‍ ടാക്‌സികളിലും നിരക്കുവര്‍ദ്ധനയില്ല. എമിറേറ്റില്‍ പ്രധാന പരിപാടികള്‍ നടക്കുന്ന ചിലമേഖലകളില്‍ നിന്നും വിളിക്കുന്ന ടാക്‌സികള്‍ക്ക് മാത്രമാണ് നിരക്ക് വര്‍ദ്ധന. വേള്‍ഡ് ട്രെഡ് സെന്റര്‍, എക്‌സ്‌പോ സിറ്റി, ഗ്ലോബല്‍ വില്ലേജ് തുടങ്ങിയ കേന്ദ്രങ്ങളില്‍ ആണ് ടാക്‌സി നിരക്കില്‍ വര്‍ദ്ധന വന്നിരിക്കുന്നത്.
ഈ മേഖലകളില്‍ നിന്നും ടാക്‌സി വിളിക്കുമ്പോള്‍ മീറ്ററുകളിലെ പ്രാഥമിക നിരക്ക് ഇരുപത് ദിര്‍ഹം ആയിട്ടാണ് വര്‍ദ്ധിച്ചിരിക്കുന്നത്. നേരത്തെ ഇത് പന്ത്രണ്ട് ദിര്‍ഹം ആയിരുന്നു. ഇവിടെ പ്രത്യേക പരിപാടികള്‍ ഒന്നുമില്ലെങ്കില്‍ നിരക്ക് പന്ത്രണ്ട് ദിര്‍ഹം തന്നെ ആയിരിക്കും. ഈ മേഖലകളില്‍ നിന്നും വിളിക്കുന്ന സാധാരണമീറ്റര്‍ ടാക്‌സികള്‍ക്കും ഹലാ ടാക്‌സികള്‍ക്കും പ്രാഥമിക നിരക്കിലെ വര്‍ദ്ധന ബാധകമാണ്.
കഴിഞ്ഞ പുതുവത്സരാഘോഷങ്ങളോട് അനുബന്ധിച്ച് എമിറേറ്റില്‍ ബുര്‍ജ്ഖലീഫയും പാം ജുമൈറയും അടക്കമുള്ള പ്രദേശങ്ങളില്‍ സമാനമാം വിധത്തില്‍ താത്കാലിക നിരക്ക് വര്‍ദ്ധന വരുത്തിയിരുന്നു. ദുബൈ രാജ്യാന്തരവിമാനത്താവളത്തിലും റാഷിദ് പോര്‍ട്ടിലും ടാക്‌സികള്‍ക്ക് അധികനിരക്കാണ് ഈടാക്കുന്നത്. ഇവിടെ രണ്ടിടത്തും ഇരുപത് ദിര്‍ഹം ആണ് ടാക്‌സികള്‍ക്ക് പ്രാഥമിക നിരക്ക്.
