സൗദി അറേബ്യയില്‍ അനധികൃത താമസക്കാരായ ഇരുപത്തിരണ്ടായിരത്തിലധികം വിദേശികള്‍ അറസ്റ്റില്‍. ഒരാഴ്ച്ചക്കിടയില്‍ ആണ് ഇത്രയും വിദേശികളെ ആഭ്യന്തരമന്ത്രാലയത്തിന്റെ നേതൃത്വത്തില്‍ അറസ്റ്റ് ചെയ്തത്. പതിനായിരത്തിലധികം വിദേശികളെ കൂടി നാടുകടത്തിയെന്നും ആഭ്യന്തരമന്ത്രാലയം അറിയിച്ചു.രാജ്യത്ത് താമസ-തൊഴില്‍ നിയമങ്ങള്‍ ലംഘിച്ച് കഴിയുന്ന വിദേശികളെ പിടികൂടുന്നതിന് ശക്തമായ പരിശോധനയാണ് സൗദി ആഭ്യന്തരമന്ത്രാലയം വിവിധ സര്‍ക്കാര്‍ വകുപ്പുകളെ ഏകോപിപ്പിച്ച് നടത്തി വരുന്നത്.
സെപ്റ്റംബര്‍ ഇരുപത്തിയാറ് മുതല്‍ ഒക്ടൊബര്‍ രണ്ട് വരെയുള്ള ഒരാഴ്ചക്കാലത്ത് രാജ്യത്ത് വിവിധയിടങ്ങളില്‍ നിന്നായി 22094 വിദേശികളെയാണ് താമസ-തൊഴില്‍ നിയമലംഘനങ്ങള്‍ക്ക് സുരക്ഷാ ഉദ്യോഗസ്ഥര്‍ പിടികൂടിയത്. പിടിയിലായവരില്‍ 13731 പേര്‍ മതിയായ താമസരേഖകള്‍ ഇല്ലാതെ രാജ്യത്ത് കഴിഞ്ഞിരുന്നവര്‍ ആണെന്ന് ആഭ്യന്തരമന്ത്രാലയം അറിയിച്ചു.തൊഴില്‍ നിയമങ്ങളുടെ ലംഘനത്തിന് 3490 വിദേശികളും അതിര്‍ത്തി സുരക്ഷാ നിയമങ്ങളടെ ലംഘനത്തിന് 4873 പേരും പിടിയിലായിട്ടുണ്ട്. രാജ്യത്തേക്ക് നുഴഞ്ഞുകയറാന്‍ ശ്രമിച്ചതിന് 1337 പേരും പിടിയിലായി. ഇതില്‍ 97 ശതമാനം പേരും യെമന്‍ എത്യോപ്യന്‍ പൗരന്‍മാരാണ്.
സൗദിയില്‍ നിന്നും അനധികൃതമായി പുറത്ത് കടക്കാന്‍ ശ്രമിച്ച 37 പേരും ഇക്കാലയളവില്‍ പിടിയിലായി. 13979 വിദേശികള്‍ നിലവില്‍ സൗദിയില്‍ വിവിധ നിയമലംഘനങ്ങള്‍ നടപടിക്രമങ്ങള്‍ നേരിടുന്നുണ്ട്. 10943 വിദേശികളെ സ്വദേശങ്ങളിലേക്ക് മടക്കി അയച്ചു.
