പലസ്തീന്‍ രാഷ്ട്ര രൂപികരിക്കണം എന്ന അമേരിക്കന്‍ നിര്‍ദ്ദേശം തള്ളി ഇസ്രയേല്‍. ഗാസയുടെ പൂര്‍ണ്ണനിയന്ത്രണം ഇസ്രയേല്‍ തുടരുമെന്ന് പ്രധാനമന്ത്രി ബെന്യാമിന്‍ നെതന്യാഹു അറിയിച്ചു.ഹമാസിനെ പൂര്‍ണ്ണമായും തകര്‍ക്കും വരെ ഗാസയിലെ യുദ്ധം നിര്‍ത്തില്ലെന്നും നെതന്യാഹു അറിയിച്ചു. അമേരിക്കയും അറബ് രാഷ്ട്രങ്ങളും മുന്നോട്ട് വെക്കുന്ന ദ്വിരാഷ്ട്രവാദത്തെ പൂര്‍ണ്ണമായും തള്ളുകയാണ് ഇസ്രയേല്‍. പലസ്തീന്‍ രാഷ്ട്രത്തെ അംഗീകരിക്കില്ലെന്നും അത് അമേരിക്കയെ അറിയിച്ചെന്നും ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹു അറിയിച്ചു.
ജോര്‍ദ്ദാന്‍ നദിയുടെ പടിഞ്ഞാറുള്ള മുഴുവന്‍ പ്രദേശങ്ങളും ഇസ്രയേല്‍ സുരക്ഷയിലായിരിക്കും എന്നും നെതന്യാഹു പറഞ്ഞു. ഗാസയില്‍ ഇപ്പോള്‍ നടത്തിവരുന്ന യുദ്ധം വിജയം കണ്ടാലും ഇസ്രയേല്‍ പിന്‍വാങ്ങില്ലെന്ന സൂചനയാണ് ഇസ്രയേല്‍ നല്‍കുന്നത്. എന്നാല്‍ ഗാസ യുദ്ധത്തില്‍ ഇസ്രയേലിനെ വലിയ രീതിയില്‍ പിന്തുണയ്ക്കുന്ന അമേരിക്കയുടെ നിലപാടിന് വിരുദ്ധമാണ് ബെന്യാമിന്‍ നെതന്യാഹുവിന്റെ നിലപാട്. മേഖലയില്‍ കഴിഞ്ഞ ദിവസം സന്ദര്‍ശനം നടത്തിയ അമേരിക്കന്‍ വിദേശകാര്യസെക്രട്ടറി ആന്റണി ബ്ലിങ്കന്‍ ആവര്‍ത്തിച്ച് വ്യക്തമാക്കിയതും സ്വതന്ത്രപലസ്തീന്‍ രാഷ്ട്രം എന്ന നിലപാടാണ്.
പലസ്തീന്‍ രാഷ്ട്രം രൂപീകരിക്കണം എന്നാണ് യുഎഇയുടെ സൗദി അറേബ്യയും അടക്കമുള്ള ഗള്‍ഫ് രാഷ്ട്രങ്ങളും നിലപാട് സ്വീകരിച്ചിട്ടുണ്ട്. ഗാസ യുദ്ധം ഉടനൊന്നും അവസാനിക്കില്ലെന്നും ഇസ്രയേല്‍ പ്രധാനമന്ത്രി വ്യക്തമാക്കുന്നുണ്ട്. ഹമാസിനെ പൂര്‍ണ്ണമായും ഇല്ലാതാക്കും എന്നും മുഴുവന്‍ ബന്ദികളേയും മോചിപ്പിക്കുമെന്നും നെതന്യാഹു പറഞ്ഞു. അതിന് എത്രകാലം എടുത്താലും യുദ്ധം തുടരും എന്നും നെതന്യാഹു പറഞ്ഞു
