യുഎഇ ദേശീയ ദിനത്തോട് അനുബന്ധിച്ച് സ്വകാര്യ മേഖലയിലെ ജീവനക്കാര്‍ക്കും മൂന്ന് ദിവസത്തെ അവധി പ്രഖ്യാപിച്ചു. ഡിസംബര്‍ രണ്ട് മുതലാണ് അവധി ലഭിക്കുക. നേരത്തെ സ്വകാര്യ മേഖലയ്ക്ക് രണ്ട് ദിവസമായിരുന്നു അവധി പ്രഖ്യാപിച്ചിരുന്നത്. ഷാര്‍ജയില്‍ പൊതുമേഖല ജീവനക്കാര്‍ക്ക് നാല് ദിവസത്തെ അവധി ലഭിക്കും.
52-ാമത് ദേശീയ ദിനത്തിന്റെ ഭാഗമായി യുഎഇയിലെ സ്വകാര്യ മേഖലയ്ക്ക് മൂന്ന് ദിവസത്തെ അവധിയാണ് ലഭിക്കുക. നേരത്തെ രണ്ട് ദിവസത്തെ അവധി പ്രഖ്യാപിച്ചിരുന്നുവെങ്കിലും പുതുക്കിയ അവധി മാനവവിഭശേഷി മന്ത്രാലയം പ്രഖ്യാപിച്ചു. ഇതോടെ രാജ്യത്തെ സര്‍ക്കാര്‍ ജീവനക്കാര്‍ക്കൊപ്പം ഡിസംബര്‍ രണ്ട്, മൂന്ന്, നാല് തിയതികളില്‍ സ്വകാര്യ മേഖലയിലേയും ജീവനക്കാര്‍ക്ക് അവധി ലഭിക്കും. ശനി, ഞായര്‍, തിങ്കള്‍ ദിവസങ്ങളിലാണ് അവധി ലഭിക്കുന്നത്. ഡിസംബര്‍ 5 ചെവ്വാഴ്ച്ച രാജ്യത്ത് പ്രവൃത്തി ദിനമായിരിക്കും.
സ്വകാര്യ മേഖലയിലെ എല്ലാ സ്ഥാപനങ്ങള്‍ക്കും അവധി ബാധകമായിരിക്കും. നേരത്തെ സര്‍ക്കാര്‍ മേഖലയിലെ ജീവനക്കാര്‍ക്ക് വാരാന്ത്യ അവധിക്ക് പുറമേ തിങ്കളാഴ്ചയും അവധിയായിരിക്കുമെന്ന് യുഎഇ ഫെഡറല്‍ അഥോരിട്ടി ഫോര്‍ ഗവണ്‍മെന്റ് ഹ്യൂമന്‍ റിസോഴ്‌സസ് പ്രഖ്യാപിച്ചിരുന്നു. ഇതിനു പുറമേ ഡിസംബര്‍ ഒന്ന് വെള്ളിയാഴ്ച ഓഫീസുകളില്‍ എത്താതെ വിദൂര ജോലിയില്‍ ഏര്‍പ്പെടുന്നതിനും അനുമതി നല്‍കിയിട്ടുണ്ട്.
