യുഎഇ ദേശീയദിനത്തോട് അനുബന്ധിച്ചുള്ള പൊതുഅവധികള്‍ പ്രഖ്യാപിച്ചു. ഡിസംബര്‍ രണ്ട് മൂന്ന് തീയതികളിലാണ് അവധി. ഇത്തവണ ദേശീയദിനത്തിന്റെ ഔദ്യോഗിക പരിപാടികള്‍ ദുബൈ എക്‌സ്‌പോ സിറ്റിയിലായിരിക്കും നടക്കുക.
ഡിസംബര്‍ രണ്ട് ശനിയും മൂന്ന് ഞായറുമാണ്. കഴിഞ്ഞ വര്‍ഷവും വാരാന്ത്യ അവധി ദിനങ്ങളിലായിരുന്നു ദേശീയദിന പൊതുഅവധികള്‍. പൊതുഅവധികള്‍ വാരാന്ത്യഅവധി ദിനങ്ങളില്‍ വന്നാല്‍ മറ്റൊരു പ്രവര്‍ത്തിദിനത്തില്‍ യുഎഇ അവധി നല്‍കിയിരുന്നു. എന്നാല്‍ കഴിഞ്ഞ വര്‍ഷം ദേശീയദിനത്തിന് മറ്റ് ദിവസങ്ങളിലേക്ക് അവധി മാറ്റി നല്‍കിയിരുന്നില്ല. ഈ വര്‍ഷവും സമാനമാം വിധത്തിലാണ് രാജ്യത്ത് പൊതു-സ്വകാര്യമേഖലകള്‍ക്ക് ദേശീയദിന അവധികള്‍.അതെസമയം ഈ വര്‍ഷം ദേശീയദിനത്തോട് അനുബന്ധിച്ച് യുഎഇ സര്‍ക്കാരിന്റെ ഔദ്യോഗിക പരിപാടികള്‍ ദുബൈ എക്‌സ്‌പോ സിറ്റിയിലായിരിക്കും അരങ്ങേറുക.
കോപ് 28 കാലാവസ്ഥാ ഉച്ചകോടി എക്‌സ്‌പേസിറ്റിയില്‍ ഈ ദിവസങ്ങളില്‍ നടക്കുന്നത് കൂടി കണക്കിലെടുത്താണ് ദേശീയദിനാഘോഷവും ദുബൈയില്‍ സംഘടിപ്പിക്കുന്നത്. 2023 സുസ്ഥിരതാ വര്‍ഷം ആയി ആചരിക്കുന്നതിനാല്‍ യുഎഇയുടെ സുസ്ഥിര ഭാവിയില്‍ ഊന്നിയുള്ളതായിരിക്കും പരിപാടികള്‍
