ഐപിഎല്‍ ടീമായ റോയല്‍ ചലഞ്ചേഴ്സ് ബാംഗ്ലൂര്‍ പുതിയ പരീശിലകനെ പ്രഖ്യാപിച്ചു. സിംബാബ്‌വെ ഇതിഹാസ താരം ആന്‍ഡി ഫ്ലവറിനെയാണ് പുതിയ പരിശീലകനായി നിയമിച്ചത്. ആര്‍.സി.ബി ക്രിക്കറ്റ് ഓപ്പറേഷന്‍സ് ഡയറക്ടറായ മൈക്ക് ഹെസ്സണ് പകരമാണ് ആന്‍ഡി ഫ്ലവര്‍ പരിശീലകനായി എത്തുന്നത്. ഹെസ്സണ് ഈ മാസം അവസാനം സ്ഥാനമൊഴിയും.
ആര്‍.സി.ബി ടീം വൈസ് പ്രസിഡന്റ് രാജേഷ് മേനോനാണ് പുതിയ പരിശീലകന്റെ നിയമനം അറിയിച്ചത്. ഫ്‌ളവറുമായി ലണ്ടനില്‍ നടത്തിയ കൂടിക്കാഴ്ച്ചയ്ക്ക് ശേഷമാണ് രാജേഷ് ഇക്കാര്യം അറിയിച്ചത്. കഴിഞ്ഞ രണ്ട് സീസണുകളില്‍ ലഖ്‌നൗ സൂപ്പര്‍ ജയന്റ്‌സിന്റെ പരിശീലകനായിരുന്നു ഫ്ലവർ.
ആര്‍.സി.ബി പരിശീലകനായതില്‍ അഭിമാനമുണ്ടെന്ന് ഫ്‌ളവര്‍ പറഞ്ഞു. ‘ആര്‍.സി.ബിയുടെ പരിശീലകനായതില്‍ അഭിമാനമുണ്ട്. ടീമിനെ പുതിയ തലങ്ങളിലെത്തിക്കാന്‍ ശ്രമിക്കുമെന്നും ആന്‍ഡി ഫ്ലവർ പറഞ്ഞു.
