യുഎഇയില്‍ കഴിഞ്ഞ ഏപ്രിലില്‍ അനുഭവപ്പെട്ട അസാധാരണമഴയില്‍ വീടുകള്‍ക്ക് നാശനഷ്ടം സംഭവിച്ചവര്‍ക്കുള്ള നഷ്ടപരിഹാരം വര്‍ദ്ധിപ്പിച്ച് ഷാര്‍ജ ഭരണകൂടം. അന്‍പതിനായിരം ദിര്‍ഹമായി നഷ്ടപരിഹാര തുക വര്‍ദ്ധിപ്പിച്ചതായി യുഎഇ സുപ്രീംകൗണ്‍സില്‍ അംഗവും ഷാര്‍ജ ഭരണാധികാരിയുമായ ഷെയ്ഖ് ഡോ.സുല്‍ത്താന്‍ ബിന്‍ മുഹമ്മദ് ്ല്‍ ഖാസിമി പ്രഖ്യാപിച്ചു.ഏപ്രില്‍ പതിനാറിന് അനുഭവപ്പെട്ട അസാധാരണമഴയിലും വെള്ളപ്പൊക്കത്തിലും ഷാര്‍ജയില്‍ നിരവധി വീടുകള്‍ക്കാണ് കേടുപാടുകള്‍ സംഭവിച്ചത്.
വീടുകള്‍ക്ക് നാശംസംഭവിച്ചവര്‍ക്ക് നഷ്ടപരിഹാരം ലഭ്യമാക്കുമെന്ന് ഷാര്‍ജ ഭരണകൂടം ഏപ്രിലില്‍ തന്നെ പ്രഖ്യാപിച്ചിരുന്നു. ഇതുവരെ 618 പേര്‍ക്ക് നഷ്ടപരിഹാരം ലഭിച്ചതായി ഷാര്‍ജ ഗവണ്‍മെന്റ് മീഡിയ ബ്യൂറോ അറിയിച്ചു. മഴക്കെടുതി നേരിടുന്നവര്‍ക്ക നഷ്ടപരിഹാരം നല്‍കുന്നതിനായി പതിനഞ്ച് ദശലക്ഷത്തി മുപ്പത്തിമൂവായിരം ദിര്‍ഹം ഷെയ്ഖ് ഡോ.സുല്‍ത്താന്‍ ബിന്‍ മുഹമ്മദ് അല്‍ ഖാസിമി അനുവദിച്ചിരിക്കുന്നത്. ഇത് ഉടന്‍ അര്‍ഹരായവരില്‍ എത്തിക്കണം എന്ന് ഭരണാധികാരിയ ഷാര്‍ജ സോഷ്യല്‍ സര്‍വീസ് ഡിപ്പാര്‍ട്ട്‌മെന്റിന് നിര്‍ദ്ദേശം നല്‍കി.
മഴക്കെടുതിയില്‍ വീടുകള്‍ക്ക് കേടുപാടുകള്‍ സംഭവിച്ചവര്‍ ഷാര്‍ജ ഡിജിറ്റല്‍ പ്ലാറ്റ്‌ഫോം വഴി അപേക്ഷിക്കണം എന്ന് അധികൃതര്‍ ആവശ്യപ്പെട്ടു.
