പാലായ്ക്കടുത്ത് രാമപുരത്ത് മൂന്നു പെൺമക്കളുടെ കഴുത്തറുത്ത ശേഷം അച്ഛൻ തൂങ്ങി മരിച്ചു. രാമപുരം ചേറ്റുകുളം സ്വദേശി ജോമോൻ (40) ആണ് സ്കൂൾ വിദ്യാർത്ഥിനികളായ മക്കളുടെ കഴുത്ത് അടുത്തത്. ഇന്നലെ അർദ്ധരാത്രി പന്ത്രണ്ടരയോടെ ആയിരുന്നു സംഭവം. ഗുരുതരമായി പരിക്കേറ്റ പെൺകുട്ടികളെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്.
അനന്യ 13, അമേയ 10, അനാമിക ഏഴ് എന്നിവരാണ് അച്ഛൻ്റെ ക്രൂരതക്ക് ഇരയായത്. അനാമികയുടെ നില അതീവ ഗുരുതരമായി തുടരുകയാണ്. പരുക്കേറ്റ ഒരു പെൺകുട്ടി തൊട്ടടുത്തുള്ള ബന്ധുവീട്ടിലേക്ക് ഓടി ചെന്നതോടെയാണ് സംഭവം നാട്ടുകാർ അറിഞ്ഞത്. രാമപുരം പോലീസ് സ്ഥലത്തെത്തിയപ്പോഴേക്കും ഇയാൾ തൂങ്ങി മരിച്ച നിലയിൽ കണ്ടെത്തുകയായിരുന്നു.
ജോമോനെയും മക്കളെയും ഭാര്യ ഉപേക്ഷിച്ചു പോയിരുന്നു. മൂന്ന് പെൺമക്കളുമൊത്ത് ജോമോൻ കഴിഞ്ഞ ഒന്നര വർഷമായി ഈ വീട്ടിൽ താമസിക്കുകയാണ്. പെട്ടന്നുള്ള പ്രകോപനത്തിന് കാരണമെന്താണെന്ന് വ്യക്തമല്ല. സംഭവത്തിൽ പൊലീസ് അന്വേഷണം തുടങ്ങി.
