ലണ്ടനില്‍ ഹീത്രൂ വിമാനത്താവളത്തിലെ വൈദ്യുതി സബ്‌സ്‌റ്റേഷനില്‍ പൊട്ടിത്തെറി. വിമാനത്താവളം താല്‍കാലികമായി അടച്ചു. അപകടത്തെ തുടര്‍ന്ന് പതിനാറായിരത്തിലധികം വീടുകളില്‍ വൈദ്യുതി ബന്ധം വിച്ഛേദിക്കപ്പെട്ടു.
ലണ്ടനിലെ ഹെയ്‌സിലുള്ള നോര്‍ത്ത് ഹൈഡ് ഇലക്ട്രിക്കല്‍ സബ് സ്‌റ്റേഷനിലായിരുന്നു പൊട്ടിത്തെറി ഉണ്ടായത്. അപകടത്തെ തുടര്‍ന്ന് ആയിരത്തിലധികം വിമാന സര്‍വ്വീസുകള്‍ വഴി തിരിച്ചുവിടുകയും റദ്ദാക്കുകയും ചെയ്തു. ഇന്ന് അര്‍ദ്ധരാത്രി വരെ വിമാനത്താവളം അടച്ചിടുമെന്ന് അധികൃതര്‍ അറിയിച്ചു. യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കുന്നതിനായാണ് അടച്ചിടുന്നതെന്ന് വിമാനത്താവളാധികൃതര്‍ അറിയിച്ചു. അപകടത്തിന്റെ കാരണം വ്യക്തമല്ല. വിമാനത്താവളത്തിന്റെ പ്രവര്‍ത്തനങ്ങള്‍ പുനരാരംഭിക്കുന്നതിനെക്കുറിച്ച് കൂടുതല്‍ വിവരങ്ങള്‍ ലഭ്യമാകുന്നതനുസരിച്ച് പങ്കുവെക്കുമെന്ന് അധികൃതര്‍ അറിയിച്ചു. സാഹചര്യം പരിഹരിക്കാന്‍ തങ്ങള്‍ പരമാവധി ശ്രമിക്കുന്നുണ്ടെന്നും വിമാനത്താവള അധികൃതര്‍ അറിയിച്ചു.
യാത്രക്കാര്‍ വിമാനത്താവളത്തിലേക്കുള്ള യാത്ര ഒഴിവാക്കണമെന്നും കൂടുതല്‍ വിവരങ്ങള്‍ക്ക് അതത് എയര്‍ലൈനുകളുമായി ബന്ധപ്പെടണമെന്നും വിമാനത്താവള അധികൃതര്‍ നിര്‍ദേശം നല്‍കി. സബ്‌സ്റ്റേഷനിലെ തീപ്പിടിത്തത്തെത്തുടര്‍ന്ന് 16,000ത്തിലധികം വീടുകളില്‍ വൈദ്യുതിബന്ധം വിച്ഛേദിക്കപ്പെട്ടു. 150ലധികം ആളുകളെ ഒഴിപ്പിച്ചതായി ബ്രിട്ടീഷ് മാധ്യമങ്ങള്‍ റിപ്പോര്‍ട്ട് ചെയ്തു.
